Хүний эрхийн өдөрт - төрийн соёрхолт Хонхны дуу

Ардчиллын сүлд дуу болсон Хонхны дуу олон нийтэд хүрсний 25 жилийн ой өнөөдөр тохиож байна. Өдгөөгөөс 25 жилийн өмнө Хонх хамтлаг Хонхны дуугаа тухай үеийн Хүүхэд залуучуудын театрын гадна талбайд дуулж анх удаа олон нийтийн хүртээл болгож байсан бол өнөөдөр Хонх хамтлагийн зохиосон дуунуудыг монголын рок хамтлагын төлөөлөл болсон залуус Улаанбаатар чуулгын гадна талбайд дуулж амилууллаа.

Өнөөдрийн тоглолтод амьд хөгжлийн А Sound, Lemons, Madness, Fire хамтлагууд Хонх хамтлагийн дуунуудаас дуулсан нь Ардчилсан хувьсгалд бие сэтгэлээрээ зүтгэж явсан ахмадууд, шинэ залуу үеийнхнийг баясгасан юм. Тэрчлэн Хонх хамтлагийн дуучин, нэр сэтгүүлч С.Цогтсайхан агсны төрсөн дүү С.Алтанхуяг, хүү Ц.Түшиг нар нь тоглолтод оролцож аавынхаа, ахынхаа зохиосон дуунаас дуулсан юм.

Мөн өнөөдрийн үйл явдалтай давхацсан бас нэгэн гэнэтийн бэлэг нь 25 жилийн тэртээ өвлийн тэсгим хүйтний хайруу жаврыг үл ажран ардчилсан хувьсгалын түрлэг болон цуурайтсан алдарт Хонхны дуунд Монгол Улсын Ерөнхийлөгч Ц.Элбэгдорж зарлиг буулган Төрийн соёрхол хүртээсэн явдал байлаа. Төрийн ордонд шагналаа гардаж авсан Хонх хамтлагийн гоцлол дуучин Энхбаяр, С.Цогтсайхан агсны эхнэр Н.Наташа, С.Цогтсайхан агсны төрсөн ах С.Майнбаяр, Ардчиллын анхдагч С.Амарсанаа, Б.Базаррагчаа болон ардчилсан хувьсгалд хонхны дуугаар жигүүр хийн зүтгэж явсан ахмадууд хүрэлцэн ирж Хонхны дуугаа хамтран дуулсан юм.

Ийнхүү ардчилал, хүний эрхийн сүлдэн дуулал болсон Хонхны дууг хүндэтгэсэн тоглолт, Хүүхэд залуучуудын театрын гадна цугласан залуусын урам зориг өвлийн хүйтэн жаврыг уяраан байлаа.