Бүгд Найрамдахчуудын Олон Улсын Хүрээлэн (БНОУХ), Нийслэлийн Засаг даргын Тамгын газар хамтран Авлигын эсрэг нийслэлийн хөтөлбөрийн хүрээнд “Төсвийн мэдээллийг иргэдийн хэрэгцээнд” хэлэлцүүлгийг 2016 оны 4 дүгээр сарын 26-нд Хангарьд ордны хурлын их танхимд зохион байгууллаа.
Уг хэлэлцүүлгээр БНОУХ-гийн төсвийн ил тод байдлыг сайжруулж, иргэдэд хүртээмжтэй болгох “иргэний төсөв” бүхий аргачлалыг нэвтрүүлэх иргэний нийгмийн санаачлагыг дэмжих ажлын үр дүнгээс танилцууллаа.
Иргэний төсөв гэдэг нь төсвийн мэдээллийг иргэдэд хүртээмжтэй болгож боловсруулсан төсвийн ил тод байдлын үр дүнтэй арга хэрэглүүр билээ. Төсвийн ил тод байдал нэмэгдэж, техник хөгжиж, иргэд, иргэний нийгмийн оролцоо сайжирч буй өнөө үед төсвийн мэдээллийг иргэний төсвийн арга хэлбэрээр иргэдэд хүртээмжтэй болгон хүргэснээр дүүрэг хорооны Иргэний танхим дахь иргэдийн идэвхтэй, үр бүтээлтэй оролцоог хангах бөгөөд Авлигын эсрэг нийслэлийн хөтөлбөрийн “Тунгалаг санхүүтэй Улаанбаатар,” “Иргэн, иргэний нийгмийн оролцоо” зорилтыг хэрэгжүүлэхэд хувь нэмэр оруулах боломжтойг хэлэлцүүлгээр онцоллоо.
Хэлэлцүүлгээр Иргэний төсөв боловсруулах гарын авлагыг БНОУХ-тэй хамтран боловсруулсныг болон төсвийн мэдээллийг иргэдийн хэрэгцээнд хүргэх талаар “Ил тод байдал сан” ТББ-ын тэргүүн Д.Цэрэнжав, Иргэний төсөв боловсруулах тухай олон улсын туршлагаас БНОУХ-гийн ажилтан Д.Монголжингоо, мөн Чингэлтэй дүүргийн эрүүл мэндийн нэгдэл, Сонгинохайрхан дүүрэг дэх цэцэрлэг, Баянзүрх дүүргийн орон нутгийн хөгжлийн сангийн төсвийн талаар инфографик боловсруулсан туршлагаас Бодлого судлал, мэдээллийн төвийн захирал Г.Болормаа, Ардчиллын боловсрол төвийн ажилтан Т.Ивээл, Стандарт шийдэл, мониторингийн төвийн захирал А.Энхтүвшин нар тус тус танилцуулсан юм. Уулзалтад Нийслэлийн Иргэдийн Төлөөлөгчдийн Хурлын Ажлын албаны Иргэний оролцооны хэлтэс, 9 дүүргийн ИТХ-ын ажлын алба, Засаг даргын Тамгын газар, Боловсролын хэлтсийн холбогдох мэргэжилтнүүд, Авлигын эсрэг нийслэлийн олон нийтийн зөвлөлийн гишүүд болон БНОУХ-гийн 2015 онд зохион байгуулсан иргэний төсвийн талаарх сургалтанд оролцсон иргэний нийгмийн төлөөлөл бүхий нийт 70 гаруй хүн оролцож иргэний төсвийн загварыг иргэдийн оролцоотой хэлэлцүүлэгт хэрхэн ашиглаж болох талаар хэлэлцлээ.
БНОУХ Монгол Улсад 1992 оноос үйл ажиллагаагаа хэрэгжүүлж эхэлсэн бөгөөд төрийн байгууллагуудад итгэх иргэдийн итгэлийг сааруулж байгаа авлигатай тэмцэх ажилд дэмжлэг үзүүлж ирсэн туршлагатай. БНОУХ нь хүрээлэнгийн гаргасан Авлигад өртөх эрсдлийн үнэлгээ болон нийслэлийн удирдлагын боловсруулсан авлигын эсрэг стратегийн төлөвлөгөөн дээр суурилсан нийслэл хотын засаг захиргаанд ил тод байдал, хариуцлага болон иргэдийн оролцоог нэмэгдүүлэх санаачлагат ажлуудыг дэмжин ажилладаг. Ингэхдээ БНОУХ Улаанбаатар хотын захиргаа болон иргэний нийгмийн байгууллагуудтай хамтран ажиллаж байгаа юм. Хэлэлцүүлэгт тавигдсан сэдвүүд :
- Иргэний төсвийн гарын авлага
- Иргэний төсвийн ойлголт олон улсын түвшинд
- Баянзүрх дүүргийн орон нутгийн хөгжлийн сангийн төсвийн ил тод байдал - судалгааны үр дүн
- Чингэлтэй дүүргийн Эрүүл мэндийн төвийн төсвийн ил тод байдлын тухай хэрэгслийг боловсруулсан туршлага
- Цэцэрлэгийн төсвийн инфографик
No comments:
Post a Comment