Конрад-Аденауэр-Сан болон Стратегийн судалгааны хүрээлэн хамтран Монгол Улсын байнга төвийг сахих бодлого ба Монгол-Европын харилцаа сэдэвт уулзалт-хэлэлцүүлгийг өнөөдөр зохион байгууллаа.
Дотоодын эрдэмтэн, судлаачид, ахмад дипломатуудын төлөөллийг оролцуулсан энэхүү хэлэлцүүлэг төвийг сахих бодлогыг онол, практикийн талаас хөндөн ярилцаж, олон улсын туршлага, алдаа оноог тунгаан хэлэлцсэнээрээ ач холбогдолтой боллоо. Тухайлбал, Туркменистан улс нь НҮБ-аар төвийг сахих статусаа баталгаажуулсан цорын ганц улс гэдгээрээ сонирхол татаж байгаа бол Австри улс гадаад бодлогын аливаа алхам, үйлдлээ төвийг сахих статуст нь нийцэж буй талаар олон улсын аливаа асуудлаар шийдвэр гаргах үед тайлбарлан ойлгуулдаг онцлогтой тул эдгээр улсын туршлагад түлхүү анхаарал хандуулж байгаа нь хэлэлцүүлгийн явцаас ажиглагдлаа.
Энэхүү хэлэлцүүлэг Монгол улсын байнга төвийг сахих статусын тухай хуулийн төсөл УИХ-д өргөн баригдаад байгаа хугацаатай давхцаж байгаагаараа онцлогтой төдийгүй Монгол Улсын гадаад бодлогын анхаарал татаад байгаа асуудлаар ийнхүү судлаачид цуглан санал бодлоо солилцож байгаа нь төрийн шийдвэр шинжлэх ухааны үндэслэлтэй, судалгаанд суурилсан байх зорилгод чиглэж байгаа юм.
No comments:
Post a Comment