Үндсэн хуулийн зохих заалтыг удирдлага болгон Монгол Улсын Ерөнхийлөгч Цахиагийн Элбэгдорж бүрэн эрхийнхээ хугацааны бодлого, үйл ажиллагааны хөтөлбөртөө “Иргэн төв”-тэй бодлогыг үндсэн зарчим болгож, төвлөрлийг сааруулах, шийдвэр гаргах бүх түвшинд иргэдийн оролцоог нэмэгдүүлэх, төлөөллийн ардчиллаас шууд ардчиллын үндэсний тогтолцоог бүрдүүлэх, төрийн бодлогод тусгах тодорхой ажлуудыг хийж байгаа билээ.
2013 оны 1 дүгээр сарын 1 нээс мөрдөгдөж эхэлсэн “Төсвийн тухай” хуульд Монгол Улсын Ерөнхийлөгчийн зүгээс орон нутгийн төсөвт иргэдийн оролцоог хангах талаар бие даасан бүлэг, зүйл заалт оруулсан нь төсвийн менежментэд иргэдийн оролцоог баталгаажуулсан эрх зүйн томоохон шинэтгэл боллоо.
Монгол Улсын түүхэнд нийгмийн материаллаг баялгийн хуваарилалт, түүний зарцуулалтад иргэдийг оролцуулах эрх зүйн зохицуулалтыг Төсвийн тухай хуулийн шинэтгэлээр эхлүүлсэн нь урд өмнө огт байгаагүй цоо шинэ үйл явц юм.
Тус хуулиар орон нутаг төсвийн тодорхой эрх мэдэлтэй болж байгаа бөгөөд нутгийн захиргаа баг, хорооны иргэдээсээ санал асууж хамгийн их санал авсан асуудалд хөрөнгө, мөнгөө хуваарилдаг зарчимд шилжиж байна.
Төсвийн тухай хуулинд туссан иргэдийн оролцооны шинэ үзэл баримтлалыг хэрхэн яаж бодит ажил хэрэг болгох вэ? гэсэн асуултыг иргэд маань тавьж байна. Төсвийн төвлөрлийг сааруулахад иргэдийн оролцоог хангах чиглэлээр нийтэд ойлгомжтой, цэгцтэй бодлого, арга механизм үгүйлэгдэж байна.
Монгол Улсын Ерөнхийлөгчийн Тамгын газраас Төсвийн чиглэлээр шийдвэр гаргахад иргэдийн оролцоог хэрхэн хангах талаар багц журмуудын төслийг боловсруулаад “Иргэний танхим”-аар хэлэлцүүлэн бэлэн болгоод байгаа билээ.
Төрийн болон нутгийн өөрийн удирдах байгууллагууд орон нутгийн түвшинд шийдвэр гаргахдаа иргэдийг оролцуулах, тэдний саналыг бодлогод тусгах, гүйцэтгэлийг ил тод тайлагнах, нээлттэй хэлэлцүүлэг зохион байгуулж хэвшүүлэх, нийтийн зар мэдээг хүргэх, олон нийтийн санал асуулга явуулах, “Иргэний танхим”-уудыг байгуулж үйл ажиллагааг нь тогтмолжуулан чадваржуулах зэргээр шинэтгэлийн олон алхмуудыг орон нутагт эхлүүлэх, эрчимжүүлэх шаардлага зүй ёсоор тавигдаж байна.
Иймээс Монгол Улсын Ерөнхийлөгчийн Тамгын газраас санаачилан Конрад Аденауэрын сангийн санхүүгийн дэмжлэгээр 3 дугаар сарын 12,13-нд “Орон нутгийн өөрөө удирдах байгууллагаар дамжуулан иргэдийн оролцоог нэмэгдүүлэх нь” сургалт-зөвлөлгөөнийг
Нийслэл, дүүргийн Иргэдийн Төлөөлөгчдийн Хурлын төлөөлөгчид, хурлын ажлын алба, иргэний оролцооны хэлтэс, иргэний танхимын ажилтанууд, Иргэдийн нийтийн хурлын тэргүүлэгчид, /иргэний зөвлөлийн гишүүд/
Бүх шатны засаг дарга нар, ЗДТГ-ын иргэдийн өргөдөл хүсэлтийн асуудал хариуцсан мэргэжилтэн, албан хаагчдад зориулан зохион байгуулж байна.
Хаана: Нийслэлийн төр захиргааны 5 дугаар байр
Нийслэлийн “Иргэний танхим” /Хуучнаар Залуучуудын соёлын төв/
Зорилго: Орон нутгийн өөрийн удирдлагын байгууллага, нийслэл дүүргийн Иргэдийн Төлөөлөгчдийн Хурал тэдгээрийн төлөөлөгчид /Засаг дарга, түүний Тамгын газар/ аливаа шийдвэр гаргахдаа иргэний оролцооны талаарх Монгол Улсын төрөөс баримталж буй бодлого, стратегийн баримт бичгүүдийг удирдлага болгох, гаргасан шийдвэрийнхээ хэрэгжилтийг хангах, гүйцэтгэлийг ил тод тайлагнах, нээлттэй хэлэлцүүлэг зохион байгуулж хэвшүүлэх, нийтийн зар мэдээг хүргэх, олон нийтийн санал асуулга явуулах, “Иргэний танхим”-уудыг байгуулж үйл ажиллагааг нь тогтмолжуулан чадваржуулах зэргээр үйл ажиллагаандаа тогтмол ашигладаг механизм, оролцооны шинэ соёл бий болгоход оршино.
Зорилт:
Дээрх зорилгын хүрээнд шийдвэр гарах түвшин дэх иргэдийн оролцоог нэмэгдүүлэх, төлөвшүүлэхэд орон нутгийн болон төрийн бүх шатны байгууллага түүний удирдлага, хэвлэл мэдээлэл, иргэний нийгмийн байгууллагууд, иргэдэд нэгэн зэрэг өргөн хүрээний мэдлэг, мэдээлэл олгох, гэгээрүүлэх, сурталчилан таниулах үйл явцыг орон даяар түгээн дэлгэрүүлэхэд үйл ажиллагаагаа чиглүүлэн ажиллахад оршино.
Сургалт-зөвлөлгөөнд оролцогч, төлөөлөгчид нь шууд ардчилал, иргэний оролцооны талаарх бодлогыг орон нутагт зохион байгуулж хэрэгжүүлэхэд бэлтгэгдэнэ.
No comments:
Post a Comment